Psalms 106

Mboe 106

Zin Israel timbel zooroŋana. Mi muŋaiŋana ki Anutu irao imap na som

1Haleluya!
Leleyom ambai pa Yooba mi kapakuri. Pa ni ambaiŋana kat.
Ni ko itoto sua kini mbukŋana mi iurur leleene pa wal kini ma alok.
2Asiŋ irao inin uraata bibip ta Yooba ikamam na?
Mi asiŋ irao isoyaara mbulu kini boozomen ta iti tapakurkuri pa i ma imap? Som.

3Zin wal ta so timendernder pizin tomtom mi tiuluulu zin pa pataŋana kizin,
mi tikamam mbulu ndeeŋeŋana totomen, nako lelen ambai kat.
Pa kampeŋana ki Anutu ko imbotmbot se kizin.

4O Yooba, nu itum ta peikat zin Israel mi kam zin ma tiwe lem.
Sombe swe kampeŋana ku pizin mini mi kamke zin pa pataŋana kizin, na motom iŋgal yo mi uulu yo tomini.
Pa leleŋ be ituŋ aŋre kat mbulu ambaiŋana tabe kam pizin i.
Mi sombe uulu zin ma timbot ambai mini, mi kam zin ma lelen ndabok,
na leleŋ be aŋgaaba zin, mi niamŋan menmeen yam mi ampakuru.

6Niam taiŋgi, mbulu tiam sa irao pa nu motom som. Pa amkamam sanaana kembei ta tumbuyam bizin.
Amkam ŋoobo kek. Pa zaala ku, amtoto som.
7Indeeŋe tumbuyam bizin timbotmbot Aikuptu na,
nu kam uraata bibip pizin. Uraata tana ipa ndel kat.
Tamen zin tikam ŋgar pa som.
Mi nu urur lelem pizin mi muŋaiŋai zin biibi kat.
Tamen zin matan iŋgalŋgal mbulu ku tana som.
Nu ta Anutu kor kana kat. Mi zin tila tipet Tai Siŋsiŋŋana, to tikam zooroŋana pu. ^a

8Tamen Yooba, ni zaana biibi pa mburaana mi muŋaiŋana kini.
Tana ikamke zin bekena iswe mburaana biibi ma ipet mat.
9Indeeŋe tana, ni kalŋaana isala ma iso la pa Tai Siŋsiŋŋana, to imet ma iwe ru, mi toono raraazaŋana ipet.
To iyaaru wal kini ma tipa pa magargaara ta imbot meleebe kat na, ma tila. ^b
10Tana ni ikamke zin pa kan koi bizin.
Itatke zin la kan koi bizin naman, tana zin tirao be tipasaana zin som.
11To tai imiili ma ilol kan koi bizin ma timetmeete lup.
Kizin tasa imbot mini som.
12Tona zin Israel tiurla sua kini,
mi timbo mboe pakurŋana pini. ^c

13Tamen molo som to, matan mbeleele uraata bibip ta ni ikam pizin na.
Mi tisa i be iswe ŋgar kini pizin som.
Tito zitun ŋgar kizin men.
14Pa indeeŋe ta timbotmbot lele bilimŋana na, nin gesges pa kini mataana ta, mi tikam kaisiigi be tikan koroŋ matakiŋa.
Tana tisu mi tisombe titoombo Yooba mburaana. ^d
15Mi koroŋ ta tiwi i pa na, ni ikam pizin.
Tamen iur mete sananŋana ma ipasaana zin tomini.

16Zin tilup zin ma timbotmbot su lele bilimŋana na,
tomtom kizin pakan timaŋga mi matan mburmbur pa Mose ziru toono Aron ta mbesooŋo potomŋana ki Yooba na. ^e
17To toono kwoono ikaaga, mi iwon Datan.
Mi Abiram ziŋan wal kini titoptop sula toono sumbuunu tana tomini, to toono ila imun mini.
18To you imbot saamba mi isu ma ikan wal pakan ta tito zin pa ŋgar kizin tana.
Wal sananŋan tana, you ikan zin ma timap.

19Tila tipet abal Sinai uunu, to tiurpe makau ruŋguunu pa pat gol,
mi tilek kumbun pa merere pakaamŋana tana. ^f
20Tana Anutu kizin ta zaana biibi, mi mburaana biibi, mi imbotmbot lela azuŋka kini leleene na, tipizil ndemen pini.
Mi tisu ma tipakur koroŋ ta ikanan mbutmbuutu na ruŋguunu. ^g

21Tana Anutu ŋonoono ta ikamke zin,
mi ikam uraata bibip su Aikuptu na, matan mbeleele kati.
22Ni itooro mos bibip isu toono kizin Ham,
mi ikam uraata mburanŋan isu Tai Siŋsiŋŋana. Uraata tana, tomtom tire ma timoto.
Tamen zin Israel tikam ŋgar pa som.
23Tana Anutu isombe ipambiriizi zin ma timap kat.
Tamen mbesooŋo kini Mose ta ni itunu ipeikati na,
ni imender pizin Israel ma isuŋ mbolŋana pa Anutu.
Tabe ni ikoto kete malmalŋana kini, mi ipasaana wal kini som. ^h

24Indeeŋe zin Israel tigarau toono Kanaan na, tiurla sua mbukŋana ki Yooba som.
Pa toono ambaiŋana ta ni isombe ikam pizin na, zin titit.
25Mi lelen be tito kalŋaana som,
mi timbotmbot lela beeze kizin men mi tikamam ŋunuŋunuŋ.
26Tana ni imbuk sua mbolŋana pizin, mi iwit namaana bekena ipombol sua tana ma imbol kat.
Sua ta kembei: Ni kola ikas zin su lele bilimŋana ma timap kat,
27mi iyaŋgwiiri popoŋana kizin
ma tila timbot leŋaleŋa irao lele ta boozomen.

28Indeeŋe ta tila tipet abal Peor na, tigaaba zin wal ta timbesmbeeze pa merere pakaamŋana zaana Baal.
Pa patoronŋana ta wal tana tikamam pa ke teeteŋan kizin na, zin Israel tikan ka kini tomini. ⁱ
29Tabe tipas kat Yooba keteene,
mi ni ipasaana zin pa mete sananŋana.
30To tomtom kizin ta, zaana Pineas, imaŋga mi imender la Anutu mi zin Israel mazwan, mi isuŋ pizin.
Tabe mete sananŋana tana imap.
31Mbulu kini tana, ta ikam ma Anutu ire i kembei tomtom ndeeŋeŋana.
Mi Anutu ko mataana iŋgalŋgali ta kembei ma alok.

32Zin tila ma tipet yok Meriba, to tipamalmal Yooba keteene mini.
Mi tikam pataŋana pa Mose tomini.
33Pa tipas keteene,
tabe ni ikam kat ŋgar som, mi ipiri sorok sua. ^j

34Indeeŋe ta tipet toono Kanaan na, Yooba iso pizin be tikas zin wal ta timbotmbot toono tana ma timap kat.
Tamen tikas zin som.
35Ziŋan zin Kanaan timbotmbot mbata,
mi tigabgaaba zin pa mbulu kizin soroksorok ta boozomen.
36Mi timbesmbeeze pa merere kizin pakaamŋan,
mi mbulu tana iwe kilis pizin.
37To tisu ma tikam zitun lutun bizin mi lutun moori bizin,
mi tipun zin ma timetmeete, bekena tiwe patoronŋana pa merere pakaamŋan kizin Kanaan.
38Zitun lutun bizin mi lutun moori bizin ta len uunu sa isaana som,
ta zin Israel tipun zin ma siŋin ireere su toono,
bekena tiwe patoronŋana pa zin merere pakaamŋan kizin Kanaan.
Tana tikam ma toono kizin isaana kat pa Anutu mataana. ^k
39Pa mbulu kizin iŋgeeze som,
mi sua ta ziŋan Yooba timbuk na, tipizil ndemen pa.

40Zin na, Yooba wal kini ŋonoono. Tamen tipas kat keteene.
Tabe tikam ma ni leleene pizin mini risa som.
41To izem zin la zin karkari naman,
mi kan koi bizin kadoono timboro zin.
42Tana kan koi bizin tiur pataŋana boozo ise kizin, mi tikoto zin pa mburan,
mi tikam zin ma tiwe mbesooŋo sorok pizin.

43Tana Yooba, ni mataana iŋgalŋgal zin Israel, mi itatkewe zin pa pataŋana boozomen.
Tamen zin tizorzoori, mi titoto zitun ŋgar kizin men.
Tipaŋoobo kat pa zaala kini. Tana tisu ma timbot ŋoobo kat.
44Mi Yooba ileŋleŋ tiŋiizi kizin
mi irre pataŋana kizin,
45to mataana iŋgal sua mbukŋana ta ikam pa tumbun bizin na, mi ikototo kete malmalŋana kini.
Pa ni itoto sua kini mbukŋana mi iurur leleene pa wal kini.
46Tana kan koi bizin boozomen ta tiyo zin ma tila lele kizin na,
Yooba itooro ŋgar kizin ma lelen isaana pizin Israel mi timuŋai zin.

47O Yooba, Anutu tiam, iŋgi ambot leŋaleŋa ila zin karkari mazwan.
Yogeege yam, mi kam yam ma amiili mi amlup yam su toono tiam mini.
Tonabe leleyam ambai pu mi ampakur zom potomŋana.

48Iti tapakur Yooba pa kampeŋana kini. Ni Anutu kiti Israel.
Tapakurkuri totomen!
Mi iwal biibi be tiso: “Ŋonoono.”
Haleluya!